拖延症徵狀-你係咪成日做嘢都趕頭趕命？
唔知你又有冇發覺自己成日做嘢都趕頭趕命？係因為工作量大啊，定只係因為自己係一個典型嘅deadline fighter，成日都將啲嘢拖嚟拖去，唔到最後一刻都唔開始做？如果你係後者嘅話，咁你就係一個拖延症患者，請正視呢個問題！
拖延只會令工作難以完成
點解一定要解決拖延症？
可能會有人心裡面諗：你使乜理我拖唔拖延，總之我限期之前做好件事就得啦！
的確，就結果而言，如果你真係限期前解決到，而又保證到一定質素嘅話咁當然冇問題啦。但係以經驗所得，大部分人都係做唔到嘅。喺大學嘅時候，相信好多人都係deadline fighter，將做project同温習拖到最後，結果往往喺最後階段先嚟通宵做；又或者喺工作嘅時候拖慢嚟做，令到自己miss咗上司俾嘅deadline又或者要OT搞掂佢，咁樣得出嚟嘅結果當然就唔好啦。如果係一team人做嘢，teammates又要等你完成工作先可以繼續落下一個目標。因為拖延嘅習慣影響到人又影響到自己，幾咁無謂！
拖延帶來一時快感，但後果嚴重
跟住落嚟就同大家介紹4個法寶去解決拖延症！
1. 分拆目標
有時候，我哋會將，要解將一個大嘅目標分拆開唔同細小嘅目標，等自己可以更準確咁知道自己進度。因為一個大task可能需要消耗比較長嘅時間去完成，望落可能會覺得要完成呢件事好似好遙不可及，或者會感到氣餒。但當大家試下將自己嘅task分拆開唔同嘅小目標嘅時候，大家就可以按細目標嘅完成數目去斷定自己嘅進度去到邊個位，唔會有種好似做極都做唔完嘅負面感覺，可以更好咁推動自己完成唔同嘅目標，減少拖延。
幾個小目標比一個大目標更好處理
2. 訂立To do list
上面講到要將一個大嘅目標分拆開唔同細小嘅目標，當分拆開咗唔同嘅小目標之後，我哋就需要一個To do list去記底返唔同嘅小目標去跟進返。咁樣做嘅目的一嚟可以更清晰更有條理咁展現到接住落嚟有啲咩目標需要完成，二嚟就唔怕喺分拆目標嘅時候有遺漏影響進度。
To Do List可以幫你提升行動力
3. 適當獎勵自己
當你完成到To do list上面嘅小目標之後，不仿適當咁獎勵一下自己，可以有助你完成接下來嘅目標。一條橡筋唔可以拉得太緊，喺解決拖延呢個問題亦都一樣，如果將自己逼得太緊只得適得其反，造成更大嘅反彈。所以大家不仿喺每個小目標完成後俾一啲獎勵俾自己，例如放個小休玩陣遊戲、食下甜品。只要唔係俾自己放縱，呢一啲俾自己嘅小獎勵可以俾到自己動力去完成下一項目標。
工作之外有時都要獎勵一下自己
4. 堅持
講到尾，要解決拖延症，最重要嗰樣嘢都係要堅持。如果冇堅持落去嘅心，不斷提醒自己做事唔可以拖，即使有按照上面嘅方法去做都好，好快就會重蹈覆轍。所以，大家記緊要堅定自己嘅心，不斷提醒自己今日嘅事要今日做，唔可以拖到聽日，養成返一個良好嘅習慣解決自己拖延嘅問題！
解決拖延症最重要係堅持
總結
如果你係有拖延症特徵嘅話，記得一定要改正，喺無論社交定係前途都有莫大幫助。試諗下如果你喺大學做project，你都唔希望會遇到組員或者下屬係deadline fighter啦，係咪？
