大學讀書同中學有咩唔同？
DSE攻略好多人都有講，但就好少人講大學攻略，今日就同大家分享我大學時期嘅讀書心得。以我為例，其實我讀書並唔叻，細細個因為唔識點樣去讀書，所以嗰時我係完全唔鐘意讀書，中小學嘅時候成績一直都唔好。直到讀大學我先開竅，先知道應該點樣去讀書。同埋我係懶得就懶嗰種人，對我呢啲懶人而言，喺香港填鴨式教育嘅環境下，溫書係一件極苦惱嘅事，因為好多時都要死記好多嘢入腦，係好辛苦。之但係我喺大學時都獲得唔錯嘅成績，所以今日我就同大家講下四年大學生涯裡面我係點樣讀書。
上到大學都需要努力爭取好成績
1. 讀書時讀書
首先，讀書時讀書，要盡量上齊所有堂。我讀嗰科喺工作量方面可以話係數一數二嘅多，我嘅時間表係可以每日都有堂，有啲日子甚至有三、四堂要上，所以課後剩返嘅時間已經唔多。喺咁緊湊嘅時間表下我都有返part-time同參加活動，有時都覺得幾辛苦，即使係咁我都堅持上齊所有堂。
有人話︰「喺大學唔夠時間用咪走堂囉，將時間放喺其他事仲好啦。」我係十分唔認同呢句說話，因為我會將上堂放喺第一位，再喺課餘時間做自己鐘意嘅事，絕對唔會走堂去返part-time或者去玩。我覺得上堂係必須嘅，冇聽過書自己睇notes一定唔明，有咩唔明仲可以即時問，問到明為止。
又有人會攞上堂時間嚟瞓覺，我就會諗：與其喺上堂嗰陣瞓覺，臨考試先至通宵温書，到頭來自己理解返同去問人點做嘅時間仲耐，咁點解一開始唔認真上堂，你只需要專心上三個鐘堂，何樂而不為呢？
2. 最後一堂一定要上
上齊所有堂是十分重要的
假設你真係有其他原因，真係上唔足所有堂，都務必要上最後一堂，即week 13嘅總結課堂，因為嗰堂裡面Lecturer所講嘅絕大部分都係會同考試有關。我嘅經驗就係：喺嗰一堂Lecturer會俾最多貼士大家，又會同大家講温書嘅時候有咩重點要留意。你會大概知道啲assignment同past paper嘅答案係出自lecture notes邊一個部分，温書嗰陣就可以行少啲冤枉路，考試嘅時候就唔會有咩大問題難到你，因為Lecturer可以出嘅題型其實來來去去都差唔多。
3. 做Past Paper
除咗上足堂，我會話操paper都係必須嘅。唔好以為做past paper呢件事剩係適用喺DSE，其實喺大學都係同樣嘅重要。如果嗰一科有past paper可以俾大家操嘅話，請大家少少地做一年又好，兩年又好，點都要做一做。因為每一年Exam嘅題型其實都係差唔多，無論Lecturer點樣出題，點樣調整難度，考嘅內容都係嗰份Lecture notes，可以問嘅問題同past paper都唔會相差太遠。所以past paper一定要做，卷係一定要衝！大學仲要有好多地方可以畀你去搵返以前嘅past paper，請記得一定要揾嚟做！
4. 抄Notes
上堂抄notes都好重要
至於點樣可以確保你做past paper嘅時候可以去搵到個答案呢？答案就係抄notes。上堂除咗要專心之外，最重要就係抄notes。即使當刻唔明佢講咩，識又好唔識又好，都要將重點全部抄低。而且我會用唔同顏色筆去抄低，睇起上嚟會精神好多，唔會睇落份notes係清一色沉悶嘅字海，對於我嚟講會吸引好多，令我願意去睇。
總結
其實備課啊、去圖書館借書啊、或者借錄影睇等等我喺大學時期係一次都冇做過，至於借學術書做參考更加係未試過。我問過其他讀書叻嘅朋友，佢哋都覺得呢啲係冇必要，只需要簡簡單單專心上堂、操下Paper就夠。我有時真係唔太理解，有時Professor上堂嘅時候係直程講埋個答案畀你聽，但你都係選擇上堂瞓覺，咁你出現喺課室入面又有咩意義呢？呃自己，覺得自己真係有上堂？所以大家千祈唔好浪費上堂時間，要瞓就好似我咁落堂返屋企瞓到夠。
最後奉勸大家，一定要專心上堂。記住上面提到嘅幾個要點，希望大家畢業嘅時候都會滿意自己嘅成績。
