數學應該要點讀?
數學科係一科幾大分歧嘅科目，有人可以一教就明；有人會覺得好難温極都唔識；又會有人會話只要你明白背後嘅邏輯就可以一理通百理明，成績突然猛進。眾人說法都好唔同，到底數學係咪真係咁難以理解呢？今日就同大家探討一下學習數學時有冇啲咩地方需要留意，等大家學習實踐時可以更得心應手。
數學也可以有方法有效提升成績
1. 避免死記硬背
喺香港填鴨式教育嘅環境下，令到學生好多時候都會喺心裡將讀書同死劃上等號，温習就等如死背爛背。呢種方法或者喺其他科目可能得通，但係喺數學科就好難可以奏效。數學十分講求概念，單純地將公式或答案背下係無法融會貫通的。只靠背書一開始可能會有少少成果，但當遇到嘅題型開始多、開始稍為改變，就無法活用所背下的答案。
2. 避免害怕數學
正如剛才提到，數學唔係死背就可以攞得到高分，有人即使好努力都仍然攞唔到好成績，可能因為咁樣就開始害怕，甚至抗拒數學。呢種情況其實好多學生可能都遇過，而且考試成績唔好其實並唔係世界末日，可能只係用錯方法去學，大家無須要因為咁樣而對數學產生恐懼。因為恐懼只會令你對數學失去興趣，更唔願意投放時間喺呢個科目上面，下一次測驗考試時考得差而又繼續害怕、唔鐘意呢一科，咁樣只會形成一個惡性循環。呢度所指嘅並唔係話要求大家對數學一定要好喜歡、好有興趣，只係指出大家並唔需要太過害怕佢，因為要學好數學其實都係方法的。
害怕數學只會令自己陷入惡性循環
講完喺學習數學科有啲咩要避免，跟住落嚟我就講下數學科有咩方法可以提升數學嘅水平：
1. 要打好基礎
想要學好數學，最重要係一定要由最基本開始學起，由頭打好基礎。數學其實係由最基礎開始一直延申擴展落去，之後愈高深嘅課題好大機會同之前基礎課題有聯繫，如果基礎打得唔好，去到後面出現誇單元嘅課題或題目嘅時候，大家學到愈後只會覺得愈吃力。所以打好基礎喺數學呢個科目係好重要，千祈唔好睇少呢個過程。如果你自覺自己數學科成績並唔好，請你拎起課本由最基礎最開始學一次，跟住課本做一次，咁愈去到後面嘅課題先至唔會一知半解。
2. 要親自做一次
數學科要學得好另一個要點就係大家一定要落手做一次。有時候大家上堂可能會見到老師喺黑板上面做完一次，望落好似知點做就冇再跟進。咁樣係一個好大嘅錯誤，因為大家只係睇人做一次就算而冇真係落手去做一次嘅話，你去到考試温書之前都唔會知道自己做落嘅時候會遇到啲咩問題、係咪真係完全理解呢個概念，更加唔會做得熟練、唔會入到腦。所以大家學習數學嘅時候唔好得個睇字，剩係睇完人做一次就算，真係要落手落腳做一次，計一次個答案出嚟做你先至叫識做。
數學要親手做一次先至會真係學得識
3. 要以準確為先
學數學應該係準確為先，學生喺學習時無須要因為做得慢而覺得氣餒。喺學數學嘅過程中，大家應該將做得啱定為首要目標，因為做得啱先係代表你真係明白同理解該個課題背後嘅概念。當你做過一次，過程做得啱真正明白相關概念，知道點樣得出最終答案後，之後無論題型點樣更改你都可以計得到答案出來。
4. 過程先係最重要
另一個小小嘅心得就係：即使你落手做嘅時候真係都好，唔好一嚟就睇答案，試下先諗一諗應該點樣做。學習數學嘅過程當中，思考係十分重要嘅一環。千萬唔好害怕計錯，因為錯咗先至係最寶貴嘅經驗。當你做錯一次睇完答案之後，再望返自己做錯咗啲乜，咁先係真定學識咗點計，先至真正知自己錯喺邊同唔識啲咩。
唔好怕錯，錯誤係最最最寶貴嘅經驗
總結
總括而言，學習數學切忌死記爛背，咁樣成效唔高又會令你對數學提唔起興趣。記住過程先至係最重要，希望各位同學都可以喺數學科考得好成嘅同時，亦都揾到學習數學嘅樂趣！
