抄筆記嘅重要性
唔少人喺學生年代都有抄筆記嘅習慣，因為不論係喺中小學，抑或係大專時期，抄筆記對學習都有着莫大嘅幫助。抄筆記嘅過程唔單止有助大家集中上堂同消化老師講嘅嘢，喺温習嘅時候筆記更加可以幫你更容易理解書裡面嘅內容，更有助學生吸收知識。
既然抄筆記有咁大好處，咁當中又有啲咩要訣呢？今日GETUTOR香港導師總會就同大家一齊探討一下。
抄筆記應該要點抄？
點先可以抄好筆記？跟住落嚟就同大家講其中四項要訣：
1. 簡單重點/結論代替抄寫
有啲學生會將抄筆記理解為：老師講一句我就抄一句。
咁樣並唔係抄緊筆記，你只不過係喺道默書，對於學習嘅成效其實唔大，衰啲講甚至有少少浪費時間。因為喺花時間去盲目咁抄底老師嘅說話嘅時候，你並冇理解同消化老師所講嘅內容。即使喺之後重温筆記，亦需要自己重頭學過，而且缺少咗老師從旁教導，咁樣嘅學習可以話係事倍功半。
正確嘅方法應該係喺抄底老師所講嘅課文入面嘅重點/結論，咁樣喺課後重温筆記嗰陣先可以更快記起重點同更入腦，從而提温習時嘅效率。
抄筆記時要留意邊啲係重點
2. 用唔同顏色筆抄
另一個抄筆記嘅小貼士，就係可以嘗試一下用唔同顏色嘅原子筆去抄寫。
記得以前讀書嘅時候，我會用唔同顏色筆去抄筆記。咁樣一來份筆記睇起上嚟精神同吸引好多，而唔會係沉悶嘅字海，令我更願意去睇；二來唔同顏色可以用嚟代表唔同嘅要點，咁樣我份筆記就更有條理，喺温習嘅時候就可以更清楚易明。
試下運用唔同顏色令筆記更有條理
3. 避免長篇大論
正如前面提到，多唔一定就係好。喺抄寫筆記嘅時候，要避免長篇大論。如果筆記入面每頁都係滿滿嘅文字，好容易會睇到眼都花埋，嚴重影響温習嘅動力。
請記住一點，筆記係要嚟俾自己睇，抄筆記嘅目的應該係要令自己更容易理解課本入面嘅知識，幫助自己温習。所以抄筆記最忌長篇大論，轉個講法就係唔可以冇重點！試諗下如果你份筆記每一頁都係密密麻麻嘅字海，你又會唔會想跟住份咁樣嘅筆記嚟温書呢？
如果頁頁咁多字，你都唔想睇啦
4. 令抄筆記變成思考嘅過程
咁點先可以令到筆記精簡、易明？最好嘅方法就係令到抄筆記變成自己思考嘅過程。
點為之思考嘅過程？就係喺上堂嘅時候，要用心聆聽老師嘅教導，並將內容消化同埋整合出重點，再將重點寫喺筆記裡面，而唔係老師講咗啲咩就死抄爛抄。所以抄筆記其實都係一個思考同學習嘅過程，喺抄筆記嘅時候要嘗試理解同整合課堂教嘅知識，當你温習嘅時候回望返自己歸納出嚟嘅重點嗰陣，就可以記返當時思考嘅過程，從而更快記起重點同更入腦。
抄筆記其實都係思考嘅一種方式
總結
抄筆記對於學習的用處真係好大，有助大家課後温習嘅時候可以更易理解。希望各位學生都可以養成呢個良好嘅習慣，學業成就可以更上一層樓！
