抄笔记慨重要性
唔少人喺学生年代都有抄笔记慨习惯，因为不论系喺中小学，抑或系大专时期，抄笔记对学习都有着莫大慨帮助。抄笔记慨过程唔单止有助大家集中上堂同消化老师讲慨嘢，喺温习慨时候笔记更加可以帮你更容易理解书里面慨内容，更有助学生吸收知识。
既然抄笔记有咁大好处，咁当中又有啲咩要诀呢？今日GETUTOR香港导师总会就同大家一齐探讨一下。
抄笔记应该要点抄？
点先可以抄好笔记？跟住落嚟就同大家讲其中四项要诀：
1. 简单重点/结论代替抄写
有啲学生会将抄笔记理解为：老师讲一句我就抄一句。
咁样并唔系抄紧笔记，你只不过系喺道默书，对于学习慨成效其实唔大，衰啲讲甚至有少少浪费时间。因为喺花时间去盲目咁抄底老师慨说话慨时候，你并冇理解同消化老师所讲慨内容。即使喺之后重温笔记，亦需要自己重头学过，而且缺少咗老师从旁教导，咁样慨学习可以话系事倍功半。
正确慨方法应该系喺抄底老师所讲慨课文入面慨重点/结论，咁样喺课后重温笔记嗰阵先可以更快记起重点同更入脑，从而提温习时慨效率。
抄笔记时要留意边啲系重点
2. 用唔同颜色笔抄
另一个抄笔记慨小贴士，就系可以尝试一下用唔同颜色慨原子笔去抄写。
记得以前读书慨时候，我会用唔同颜色笔去抄笔记。咁样一来份笔记睇起上嚟精神同吸引好多，而唔会系沉闷慨字海，令我更愿意去睇；二来唔同颜色可以用嚟代表唔同慨要点，咁样我份笔记就更有条理，喺温习慨时候就可以更清楚易明。
试下运用唔同颜色令笔记更有条理
3. 避免长篇大论
正如前面提到，多唔一定就系好。喺抄写笔记慨时候，要避免长篇大论。如果笔记入面每页都系满满慨文字，好容易会睇到眼都花埋，严重影响温习慨动力。
请记住一点，笔记系要嚟俾自己睇，抄笔记慨目的应该系要令自己更容易理解课本入面慨知识，帮助自己温习。所以抄笔记最忌长篇大论，转个讲法就系唔可以冇重点！试谂下如果你份笔记每一页都系密密麻麻慨字海，你又会唔会想跟住份咁样慨笔记嚟温书呢？
如果页页咁多字，你都唔想睇啦
4. 令抄笔记变成思考慨过程
咁点先可以令到笔记精简、易明？最好慨方法就系令到抄笔记变成自己思考慨过程。
点为之思考慨过程？就系喺上堂慨时候，要用心聆听老师慨教导，并将内容消化同埋整合出重点，再将重点写喺笔记里面，而唔系老师讲咗啲咩就死抄烂抄。所以抄笔记其实都系一个思考同学习慨过程，喺抄笔记慨时候要尝试理解同整合课堂教慨知识，当你温习慨时候回望返自己归纳出嚟慨重点嗰阵，就可以记返当时思考慨过程，从而更快记起重点同更入脑。
抄笔记其实都系思考慨一种方式
总结
抄笔记对于学习的用处真系好大，有助大家课后温习慨时候可以更易理解。希望各位学生都可以养成呢个良好慨习惯，学业成就可以更上一层楼！
