理想同現實中嘅大學生活

相信好多朋友喺入大學之前都有幻想過入咗大學嘅生活到底會係點，對大學嘅生活好有憧憬。但係當真係踏入大學親身體驗過後，又發覺有好多位同理想中嘅有一定嘅落差。所以，今日就同大家以過來人的經驗，同大家細數一下大家理想中嘅大學生活又同現實又有咩唔同呢。

你又有冇幻想過大學會係點過？

係咪真係唔使讀書?

當講到細過聽過最印象深刻嘅大話嗰陣，有啲人會話係讀緊中小學嘅時候老師同佢哋講：「你哋俾心機啲讀書啦，入到大學就唔使讀書嗰4年可以去玩架啦！」究竟真相係點嘅呢，係咪真係唔使讀書呢？

正確答案當然就唔係嘅，上到大學都依然仲係要讀書嘅。至於點解會有上面嗰句說話呢？因為的而且確上到大學之後學生嘅自由度相比起喺中學大好多。唔似得中學咁每日返學嘅時間已經定好哂，大學生可以自由決定點去運用每日嘅時間，亦都唔會有個班主任喺你隔離督促你上堂。亦都因為咁，有人會繼續勤勤懇懇咁讀書爭取好成績，亦都會有人將時間分配去其他事上面，例如參加唔同活動、上莊等等。但係自由度大咗，多咗時間可以去做自己想做嘅事，咁並唔代表喺大學唔使讀書。同樣地，大學大部分嘅course都會有assignment、mid-term同final exam，就算上到大學大家都係要讀書温書同做assignment，所以千祈唔好有以上嘅錯覺覺得喺大學唔使讀書！

自由度大咗，但書都係要繼續讀

大學一定要好Social？

又有人會話：「大學一定要Social，咁先至多姿多采。」呢句又係咪真嘅呢？

作為過來人，我會建議大家諗諗你嘅目的係咩。正如上面所講，大學嘅自由度係真係大咗好多，大家可以自由分配自己嘅時間同埋選擇想參與嘅活動。大學嘅活動同中學嘅都有好大嘅唔同，好多各式各樣嘅活動都可以俾你參加。同時間，有啲人會覺得上到大學一定要試下玩一下，迫自己soical下，咁先至識到人，先叫入過大學。呢個時候我就覺得要諗一諗自己嘅目的係為咩，係咪真係必要，同埋係咪真係啱自己。因為每個人性格都唔同，有人外向好動，有人就比較內向，大學入面唔係所有嘢都適用於每一個人。諗一諗點樣先至係最適合自己，唔需要人云亦云，人哋話點就逼自己去做，要記住個大學生涯係自己嘅，應該由自己去選擇點去度過。

你又有冇諗過Social嚟為咩？

總結

其實升到大學之後大家會有好大嘅自由度去決定自己嘅大學生涯想點樣渡過，所以希望大家都可以揾到最適合自己嘅大學生活，喺大學4年都可以有美好嘅回憶！