今屆DSE終於開考，考生有啲咩要留意？
2022年度嘅DSE會喺4月22號正開考，相信各位考生都非常緊張，正把握最後嘅時間盡全力衝刺，希望可以攞到好成績。但係喺埋頭苦幹温書嘅同時，各位考生都千祈唔好唔記得某啲重要嘅事項。今日GETUTOR就同大家講講各位DSE考生喺開考前有啲咩事項需要注意，確保大家喺忙於備戰嘅同時都唔會唔記得！
考生要留意以下注意事項
1. 唔該唔好影Barcode上IG啊！！！！
每年DSE都會出現一個情況，就係即使有無數人都極力勸告過，每年都依然有考生為咗打卡，喺試場入面將自己嘅Barcode影低放上Instagram或者其他社交平台。
呢個係好低級，但係好嚴重嘅過錯，考評局亦都講到明如果發生呢種情況一定會處罰相關學生。我哋喺呢道不厭其煩咁勸告各位考生多一次，喺試場裡面唔好影任何嘢同埋唔好放任何試場入面嘅嘢上社交平台，喺開考之前亦都要確保電話已經熄咗機同埋放喺座位椅下嘅當眼處，俾監考員清楚睇到。我哋真係唔希望喺任何社交台見到你張barcode同考生編號！
千祈唔好喺試場入面打卡！
2. 確保充足睡眠
唔少考生都係安排咗喺最後嘅時間入面，盡可能用盡每分每秒衝刺，希望爭取到好成績入讀心儀嘅大學。
但係衝刺還衝刺，請切記喺考試前一定要確保自己有充足嘅睡眠同休息，因為考試除咗係睇大家對唔同科目嘅認識有幾深入之外，仲好睇大家嘅臨場表現。如果大家只顧衝刺，甚至乎選擇通宵温書，而冇好好休息，咁喺考場嘅時候臨場狀態同表現就一定唔會好。試諗下你都唔夠瞓，個人處於一個咁疲倦嘅狀態，個腦又點可能轉得快，最後只會得不償失。
所以喺考試前，請一定要確保自己有充足嘅睡眠同休息，確保自己有十足嘅狀態進入試場。
有充足睡眠先至會有好嘅狀態
3. 執齊所需物品
最後，就係請確保自己帶齊所有所需物品。相信大家平時耐唔耐都會有大頭蝦帶漏嘢嘅情況，但係呢程種情況就千祈唔好俾佢喺考試嘅時候發生啦，因為咁樣好可能會影響到你嘅成績。
試諗下你喺考數學唔記得帶計算機，又或者去到試場先發現帶漏准考證，呢個情況你就可以同DSE講聲：「下年再見啦！」因為大頭蝦帶漏嘢搞到入唔到大學你話幾咁無謂呢！
所以，最好嘅方法就係喺考試前一日執好哂考試要用到嘅嘢入袋先去瞓，咁就可以避免喺出門口前先臨急臨忙去執而可能帶漏嘢嘅情況發生。
請確保自己帶齊所有嘢！
總結
最後，GETUTOR希望今屆嘅各位考生都可以攞到滿意嘅成績，入讀心儀嘅院校。
